طريقة صنع لوحة قماش

 

اهلاً اهلاً 

 راح ادون طريقة صنع لوحة قماش او علم صغير يزين فيه مدخل المنزل او الغرف وبأمكانك صنع اكثر من حجم بكل سهوله

الأدوات

1- قماش قطن للامام والخلف - وقطعة قماش بيضاء للوسط عشان تعطي ثقل

2- عود خشب ( للشوي )

3- ادوات مثل ( المشرط ، مقص ، دبابيس ، الباترون ، لون ابيض اكريلك ، خيط الخيش ، قلم الخياطه يروح بالحراره، ورق صنفره )

4- مكينة خياطه

اول شي نشتغل على العود الخشب ..

ناخذ اي عود خشب للشوي عندنا و نقصه بالمشرط بالطول الي نبيه ( انا سويته 16.5 سم ) بعدها للحواف اذا صارت مقصوصه بشكل غير مرتب تحتاجين تصنفرين الاطراف ( صنفره خشنه - ورق الصنفره الاسود ) بعد الصنفره لونيها ابيض او اي لون تحبين

تقدرين تستخدمين الاعواد الخشب الجاهزه بالمحلات للأعمال اليدويه ويكون حجمها اكبر و متنوع

الحين باترون الخياطه تطبعينه او ترسمينه مباشره على القماش ( افضل الطباعه خصوصا للمبتدئات )

طريقة المقاسات

نقص 3 قطع من القماش - الامام و الخلف و الوسط القطعه البيضاء

الامام والخلف متقابلين على الوجه الصحيح .. بعدها نخيط حول القماش بشكل مرتب ونقلب العمل

نثني 1 سم ( او حسب عرض الخشب الي معاك ) من الاعلى و نخيطه اما يدوي او ماكينه عشان نثبت العود الخشب .. بعدها نربط عليه الخيط الخيش

للكتابه عليه استخدمة الفينيل الحراري .. تقدرون تكتبون عليه ب افكال ثانيه مثل الرسم على القماش او بقص الجوخ .